Ørret: 
0
Sogn Avis, 6.september 2006:
Aure på 4,1 kilo vart landa røffleg 1.000 meter over havet. - Eg har teke ein del pen fisk, men denne opplevinga overgår alt, seier Martin Sigve Fosse.
– Eg har aldri opplevd liknande og kjem neppe til å koma borti slike sluggar fleire gonger, seier Martin Sigve Fosse (41).
Ingen ting stemde på den spesielle dagen, 1. august for å vera aldeles presis. Nordav?r, kraftig solskinn og speilblankt fjellvatn – endåtil regulert – var det sørgjelege utgangspunktet for fisketuren i høgfjellet. Men naturen er underleg, og den var det til gangs mellom i femtida om ettermiddagen.
– Eg hadde aldri i min villaste fantasi trudd at fjellheimen vår var velsigna med slike utruleg flotte eksemplar, seier den røynde fiskaren.
Martin Sigve Fosse var lenge blant Vikjas mest ivrige laksefiskar, siste åra har sportsfisket handla utelukkande om fiske i høgfjellet.
– Eg har teke ein del pen fisk men denne opplevinga overgår absolutt alt. Yeahhhh!!! brøler fiskaren i det ruggen ligg trygt på land og det verste adrenalinkikket er i ferd med å roa seg.
– Eg hadde ingen idé om at det var eit slikt fælt drog som hogg på markkroken. Eg har køyrt ein del fisk og trudde med det same at det var ein kilos aure som hadde hogge. Faktisk var det kameraten som kommenterte at her var svære saker på gong. Omar, som var uhyre kjapp med å få fatt i hoven, la merke til spennet på stonga, fortel Fosse.
Fisken braut vassflata eit par gonger, gjorde ein liten krei inn mot land for så å dra ut igjen meir snøre.
– Me fekk sjå ryggen og fekk vel eit lite sjokk begge to, seier Martin Sigve Fosse, som var iskald i det sjeldne basketaket.
4,1 kilo fisk er vanvittig når arenaen er nesten 1.000 meter over havet. Dessutan representerer fiskekondisen det beste av kvalitet, auren var faktisk på grensa til å vera i overkant feit.
– Fisken blir kaldrøykt og skal nytast ved juletider, seier Fosse.
Raudfargen på fiskekjøtet matchar til prakteksemplaret som hadde ei lengde på 66,5 centimeter, livvidda var målt til 40 centimeter.
– Fjellauren kan bli mellom fem og seks kilo. Fangstar på fire kilo er ikkje uvanleg, men det er ikkje mange av slike kaliber i kvart vatn, seier Bror Jonsson, professor i ferskvassøkologi.
– Kor gamal kan fisken frå Vikafjellet vera?
– Det er ikkje godt å seia. Den er meir enn 10 år og kan godt ha passert 20. I Noreg er det fanga fjellaure som var 40 år gamle. Som regel får slike gamle fiskar stort hovud. Slik fisken i Sogn blir karakterisert, med lite hovud, så har den vokse fort på kostnad av mindre fiskar. Den har levd som ein kannibal, opplyser Jonsson til Sogn Avis.
Fiskeguiden reknar med at storfisken vart teken i Oksavatnet.
Informasjon
Fylkesfiskeforvalter Eyvin Sølsnæs, tel + 47 57 65 51 51 / + 47 48 22 86 70, Denne e-postadressen er beskyttet mot programmer som samler e-postadresser. Du må aktivere javaskript for å kunne se den.